ஹர ஹர மகாதேவகி ஏற்படுத்திய இன்ப அதிர்ச்சியே இன்னமும் போகவில்லை. அதற்குள்ளாகவே இருட்டு அறையில் முரட்டு குத்துவோடு தயாராகியிருக்கிறார் இயக்குநர் சன்தோஷ் பி.ஜெயக்குமார்.இது மட்டுமில்லை. அடுத்து ஆர்யாவை வெச்சி கஜினிகாந்த் படத்தோட படப்பிடிப்பையும் செம ஸ்பீடா நடத்திட்டோம் என்று சந்தோஷமாக சொல்கிறார்.

என்னோட முதல் படமே அடல்ட் காமெடியை கையில் எடுத்திட்டோமேன்னு ஃபீல் பண்ணினதில்ல. பதினெட்டு வயசுக்கு மேற்பட்ட எல்லாருக்கும் பிடிக்கும் படமா ஹரஹர மகாதேவகி இருக்கணும்னு நினைச்சேன். நான் எதிர்பார்த்தது மாதிரியே நல்ல ரெஸ்பான்ஸ். படம் பார்த்துட்டும் நிறைய பேர் வாழ்த்தினாங்க.  நிறைய வி.ஐ.பி.க்களும் போன்ல பாராட்டினாங்க. ஆபாசமில்லாத அடல்ட் காமெடியா இருந்தது. 

பெண்களும் ரசிக்கும்படி இருந்துச்சு. ஆனா, இடைவேளைக்குப் பிறகுதான் அடல்ட் கன்டன்ட்கள் வந்திருந்தது. அது ஒண்ணுதான் குறை. அதை இன்னும் ஜாஸ்தி பண்ணியிருக்கலாம்னு விமர்சனங்களையும் சொன்னாங்க என்று மடமடவென்று பேசத் தொடங்கினார்.

சரக்கு எப்படி வந்திருக்கு?

அடல்ட் கன்டன்ட்டைப் பொறுத்தவரை ஹரஹர.... வெறும் டிரைலர்தான். இப்போ இயக்கியிருக்கும் இருட்டு அறையில் முரட்டு குத்துதான் மெயின் பிக்சர். அடல்ட் ஹாரர் காமெடி ஜர்னர்னால டைட்டில்ல இருந்து எண்ட் கார்டு போடுறவரை நீங்க எதிர்பார்க்குற சரக்கு நிறைய வச்சிருக்கோம்.

அதிருக்கட்டும். டைட்டில் விவகாரமா இருக்கே?

பளிச்சினு புரியற மாதிரிதானே டைட்டில் இருக்கு? ஃபேமிலி ஆடியன்ஸை கவர்ந்து இழுக்கற மாதிரி மங்களகரமா ஒரு டைட்டில் வச்சிட்டு, உள்ளே அடல்ட் மூவிக்கான படமா பண்ணியிருந்தால் அது தப்பான விஷயமாகிடும். நான் அப்படி பண்ணல, அப்படி பண்ணவும் மாட்டேன். இது அடல்ட் ஹாரர் மூவினு நேரடியா புரியற மாதிரியே டைட்டில் வச்சிருக்கேன். அதுவும் கதையோடு தொடர்பான டைட்டில்தான். நீங்க வேற ஏதோ அர்த்தத்தோடு டைட்டிலை நினைச்சா அதுக்கு நான் பொறுப்பில்ல.  நம்மூர்ல ஃபேமிலி ஆடியன்ஸுக்கான படங்களும் வாரத்துக்கு நாலு வருது. 

குழந்தைகளோடு குடும்பமா படம் பார்க்க நினைக்கறவங்க.... அவங்க படங்களுக்கு போய் பாருங்க. இது ஏ சர்டிபிகேட் படம். அந்த ஆடியன்ஸ் மட்டும் தியேட்டருக்கு வந்தால் போதும். இங்கே பேய்ப்படம்னாலே வழக்கமா ஒரு ஃபார்முலா வச்சிருப்பாங்க. அடர்ந்த காடு, ஒத்தையடி பாதை, அதில் ஒரு பங்களா, அதில் ஒரு பேய். பங்களாவில் கொடூரமான லுக்ல வேலைக்காரங்க.... அந்த பங்களாவை தேடி வரும் நாலு பேர், பேய்க்கு ஒரு ஃப்ளாஷ்பேக்னு எல்லா பேய்ப் படமுமே ஒரே மாதிரியா தான் இருக்கும். ஆனா, இருட்டு அறையில்.... அப்படியில்லை.

புது ஃபார்முலா ட்ரை பண்ணியிருக்கோம். எங்க பேய்க்கு ஃப்ளாஷ்பேக்கே கிடையாது. பேய்கிட்ட மாட்டிக்கிட்டா என்னவாகுமோ, அதை காமெடி ஹாரரா பின்னியிருக்கோம்.  ஹரஹர போஸ்ட் புரொக்‌டக்ஷன் ஒர்க்கின் போதே, இந்தப் படம் முடிவாகிடுச்சு. அப்பவே, இதோட ஷூட்டிங் ஷெட்யூலும் திட்டமிட ஆரம்பிச்சிட்டோம். நான் ஸ்கிரிப்ட் ஒர்க் பண்ணும் போதே, இது செம என்டர்டெயினரா இருக்கணும்னு நினைச்சேன். மத்தபடி மெசேஜ் சொல்றது பிடிக்காத விஷயம். தயவுசெய்து என் படங்கள்ல மெசேஜ் எதிர்பார்க்காதீங்க. ஜாலியா வாங்க, சந்தோஷமா வாங்க. அதான் என் பாலிஸி. இங்கே மெசேஜ் சொல்றதுக்கு நிறைய பேர் இருக்காங்க பிரதர்.

முதல் படத்தோட டீம்தான் இதிலுமா?

முழுசா அதே டீம்னு சொல்லிட முடியாது. கொஞ்சம் கொஞ்சம் மாத்தியிருக்கோம். ஹீரோ கவுதம்கார்த்திக்தான். ஹீரோயின்கள் வேற - வைபவி சாண்டில்யா, யாஷிகா. இவங்க தவிர டெம்பிள் மங்கீஸ் சரா, ஜான் விஜய், மொட்டை ராஜேந்திரன், பாலசரவணன், கருணாகரன்னு கலகல ஆர்ட்டிஸ்ட்கள் நிறைய பேர் இருக்காங்க. ஒளிப்பதிவை பல்லு கவனிக்கிறார். இந்தப் படத்தை 22 நாட்கள்ல முடிச்சதில் அவரோட பங்கும் அதிகம். அடுத்து இயக்கி வரும் கஜினிகாந்த்துக்கும் அவர் தான் கேமராமேன். 

ஹரஹர.... பாலமுரளிபாலு, இதிலும் இசையமைக்கிறார். என் முதல் படத்துக்கு தயாரிப்பாளர் கிடைக்கறதுக்கு முன்னாடியே சம்பளம் வாங்காமல் பாடல்கள் ரெடி பண்ணிக்கொடுத்தவர் அவர். இந்தப் படத்தையும், அடுத்த படமான கஜினிகாந்த்தையும் தயாரிக்கிறவர் ஞானவேல்ராஜா சார்தான். அவர் தயாரிப்பாளர்னு சொல்றதை விட, என் நண்பன்னு சொல்லலாம். அப்படி ஒரு கெமிஸ்ட்ரி எங்களுக்குள் இருக்கு.

உங்களுக்கும் கவுதம் கார்த்திக்குக்கும் செம கெமிஸ்ட்ரி செட் ஆகிடுச்சு போல..?

யெஸ்.... யெஸ்....! என் முதல் படத்தின் மேல நம்பிக்கை வச்சவர் கவுதம். இதில் நாங்க இன்னும் நெருக்கமான ஃப்ரெண்ட்ஸ். இந்தப் படத்துல அவருக்குனு இல்ல. யாருக்கும் எந்தக் கேரக்டரைசேஷனும் இல்ல. அப்படி ஒரு சப்ஜெக்ட் இது. இப்போ டான்ஸும் நல்லா இம்ப்ரூவ் பண்ணியிருக்கார். டைமுக்கு ஸ்பாட்டுக்கு வர்ற சின்ஸியரானவர். கவுதமுக்கு இன்னொரு ஹிட் காத்திருக்கு. இந்தப் படத்தோட ரெண்டாவது பாதியில மொட்டை ராஜேந்திரன் காமெடி பின்னியெடுக்கும்.

இதுல நிக்கி கல்ரானி நடிக்க மாட்டேன்னு சொல்லிட்டாங்களாமே?

நிக்கிகிட்ட நாங்க கேட்கவே இல்ல. அதான் உண்மை. அவங்க அப்படி சொல்லவும் மாட்டாங்க. நிக்கிக்கான ஸ்கோப் இதுல இல்ல. அவங்களுக்கான படம் அமையும்போது மறுபடியும் நிக்கி நடிக்கலாம். இதுல சக்கப்போடு போடு ராஜா வைபவி சாண்டில்யா நடிச்சிருக்காங்க. தமிழ் சினிமா லவ்வர் அவங்க. இங்கே தொடர்ந்து படங்கள் பண்ணும் ஆர்வத்துல இருக்காங்க. சின்ஸியரா தமிழ் கத்துக்கிட்டு இருக்காங்க.

நீங்க எஸ்.ஜே.சூர்யா அசிஸ்டென்டாக இருப்பீங்க போலிருக்கே..?

இல்லீங்க. நான் எங்கேயும் எப்போதும் சரவணன் சார் ஸ்கூல்ல இருந்து வந்தவன். எங்க அப்பா சி.பி.ஜெய், பல வருஷமா சினிமாவில் புரொடக்‌ஷன் எக்ஸிக்யூட்டிவ்வா இருந்தவர். அதனால நானும் சினிமா சூழல்லதான் வளர்ந்தேன். என்ஜினியர் முடிச்சிட்டு சரவணன் சார்கிட்ட இவன் வேற மாதிரியில் ஒர்க் பண்ணினேன். அப்புறம்தான் ஹரஹர.... இயக்கினேன்.

உங்க அடுத்த படமான கஜினிகாந்த் எப்படி வந்திருக்கு?

கஜினிகாந்த் டீசர் விரைவில் கொண்டு வர்றோம். இப்படி ஒரு டைட்டில் ஏன் வச்சோம்னு டீசர்ல தெரிஞ்சிடும். இந்தப் படத்துல ஆர்யா வந்ததே ஒரு மேஜிக். ஆர்யா தவிர, வனமகன் சாயிஷா சைகல், சதீஷ், கருணாகரன்னு நிறைய பேர் இருக்காங்க. இருட்டு அறையில்.... டெக்னிகல் டீமே இதிலும் ஒர்க் பண்றாங்க.