பேஸ்புக் சமூக வலைத்தளம் எப்போதுமே தமக்கு எதிராகவே இருந்தது என அமெரிக்க ஜனாதிபதி டொனால்ட் ட்ரம்ப் டிவிட்டரில் குற்றம்சாட்டியதற்கு ஃபேஸ்புக் நிறுவனர் மார்க் சக்கர்பெர்க் மறுப்பு தெரிவித்துள்ளார்.
"பேஸ்புக் எப்போதுமே ட்ரம்பிற்கு எதிராகத்தான் இருந்துவந்தது. ஊடகங்கள் எப்போதுமே ட்ரம்பிற்கு எதிரானவைதான். அதனால்தான் பொய்ச் செய்திகள் வெளியாயின. நியூயோர்க் டைம்சும், வொஷிங்டன் போஸ்டும் கூட ட்ரம்புக்கு எதிரானதாக இருந்தவையே. இவை என்ன கூட்டுச்சதியா?" என்று ட்விட்டரில் ஒரு பதிவிட்டார் அமெரிக்க ஜனாதிபதி.
அமெரிக்க ஜனாதிபதித் தேர்தலில், ரஷ்யாவின் குறுக்கீடு உள்ளதாகக் கூறப்படும் விவகாரத்தை விசாரிக்கும் காங்கிரஸ் விசாரணைக் குழுவிடம் தமது 3,000 அரசியல் விளம்பரங்களை பேஸ்புக் நிறுவனம் விரைவில் அளிக்கவுள்ளது.
2016ஆம் ஆண்டு, அமெரிக்க தேர்தல் நடந்தபோதும் , அதற்கு பின்பும், பேஸ்புக்கின் விளபரங்களை, ரஷ்ய நிறுவனங்கள் வாங்கியிருக்கலாம் என பேஸ்புக் நம்புகிறது.
ரஷ்யாவின் தலையீடு உள்ளதாக கூறப்படும் குற்றசாட்டுகளுக்காக, நவம்பர் முதலாம் திகதி பேஸ்புக், கூகுள் மற்றும் ட்விட்டர் நிறுவனங்கள், அமெரிக்காவின் புலனாய்வுக் குழு முன்பு சாட்சியம் அளிக்குமாறு கேட்டுகொள்ளப்பட்டுள்ளது.
தங்களுக்கான அழைப்பு கடிதம் வந்துள்ளது என உறுதிசெய்துள்ள, பேஸ்புக் மற்றும் கூகுள் நிறுவனங்கள், குறிப்பிட்ட நாளில், ஆஜராவது குறித்து இன்னும் எதுவும் கூறவில்லை.
ட்ரம்ப்பின் கருத்திற்கு, பேஸ்புக் பதிவில் பதிலளித்துள்ள மார்க் சக்கர்பர்க், எல்லா விதமான சிந்தனைகளுக்குமான களமாக பேஸ்புக்கை உருவாக்கக்கடுமையாக முயற்சித்து வருவதாகக் கூறியுள்ளார்.
அந்த "பிரச்சனைக்குரிய விளம்பரங்களைத்" தவிர்த்து, பேஸ்புக் ,"மக்களுக்கு ஒரு குரலை அளித்துள்ளது, வேட்பாளர்கள் மக்களிடம் நேரடியாக கலந்துரையாட வழிவகை செய்துள்ளது, இலட்சக்கணக்கானோர் வாக்களிக்க உதவியுள்ளது" தங்களுக்கு பிடிக்காத விடயங்கள் குறித்து, அமெரிக்க அரசியலின் இரு தரப்பினருமே வருத்தத்தில் இருப்பதாக குறிப்பிட்டுள்ள அவர், தாராளவாத சிந்தனை உடையவர்கள் ட்ரம்பின் வெற்றியைத் தான் சாத்தியப்படுத்தியதாக தன் மீது குற்றம் சுமத்துவதாகக் குறிப்பிட்டுள்ளார்.
